Ukrayna “Lukoil”in qazma qurğularını vurub

Ukrayna Müdafiə Qüvvələrinin bölmələri Xəzər dənizi akvatoriyasında Rusiyanın "Lukoil" korporasiyasına məxsus üç qazma qurğusunu vurub.

Bu barədə Ukrayna Silahlı Qüvvələrinin Baş Qərargahı teleqram kanalında xəbər yayıb.

"Bu obyektlər Rusiya Ordusunun təminatında istifadə olunur. Dəqiq zərbələr qeydə alınıb. Ziyanın miqyası dəqiqləşdirilir", – deyə məlumatda bildirilir.

Bundan əlavə, Müdafiə Qüvvələri Luqansk vilayətinin Baraniçevo qəsəbəsi yaxınlığında "Buk-M3" zenit-raket kompleksi buraxılış qurğusunu atəşlə məhv edib. Bu ortamənzilli HHM kompleksi aerodinamik hədəflərlə mübarizə üçün nəzərdə tutulub. İlkin məlumatlara görə, zərbələr və partlayışlar qeydə alınıb.

Ukrayna Baş Qərargahının məlumatına görə, həmçinin Rusiya ordusunun maddi-texniki bölməsinə aid anbar Xerson vilayətinin Novotroitske qəsəbəsi yaxınlığında vurulub. Bu zərbə Rusiya Federesiyası Silahlı Qüvvələrinin logistika və döyüş qabiliyyətini zəiflətmək məqsədi daşıyır.