Ukrayna Prezidenti korpus komandirləri ilə görüşdü

"Ukrayna avqusta qədər özünü mümkün qədər gücləndirməli və payızda Rusiyanın mümkün hərəkətlərinə hazırlaşmalıdır".

Bunu Ukrayna Prezidenti Volodimir Zelenski Baş Qərargahda keçirilən iclasda bildirib.

O, əsas döyüş tapşırıqlarını yerinə yetirən korpus komandirləri ilə bir neçə günlük görüş keçirib.

Görüşdən sonra Baş Qərargahın xüsusi iclasını çağırıb. İclasda çıxış edən Zelenski "Ukrayna gələn aya mümkün qədər güclü şəkildə girməlidir”, – deyə bildirib.

"Bu məqsədlə müdafiə strategiyasının tənzimlənməsi, eləcə də ordu üçün silah istehsalı və təchizatı üçün prioritet sahələrin müəyyənləşdirilməsi üzərində işlər davam edir. Əsas diqqət qoşun təchizatı, tədarük məsələləri, əlavə maliyyələşdirmə və müqavilələrə yönəldilməlidir. Cəbhənin ən gərgin bölgələrində lazım olan müxtəlif növ dronların, yerüstü robot sistemlərinin, uzaqmənzilli artilleriya sursatlarının və digər avadanlıqların təchizatı diqqətimizdədir. Korpuslar, istehsalçılar və dövlət strukturları arasında koordinasiya Müdafiə Nazirliyi və Milli Təhlükəsizlik Şurası tərəfindən həyata keçiriləcək", – deyə dövlət başçısı qeyd edib.

Zelenski Ukraynanın payızda müxtəlif ssenarilərə və Rusiyanın hərəkətlərinə hazır olması üçün avqust ayına qədər ölkənin müdafiə qabiliyyətini maksimum dərəcədə artırmağın vacibliyini vurğulayıb.