Ukrayna "B" planını işə salır | Podolyak “Baku TV”yə danışdı

Son vaxtlar ABŞ-dən və bəzi Avropa ölkələrindən Ukraynaya yardımların ləngiməsi ölkədə gedən genişmiqyaslı müharibə səbəbindən ciddi müzakirələrə səbəb olub.

Rəsmi Kiyev isə işğal olunan ərazilər azad edilənə qədər savaşın davam edəcəyini bildirərək, “B” planı olduğunu açıqlayıb.

Ukrayna Prezident Ofisinin müşaviri Mixaylo Podolyak Baku TV-nin Şərqi Avropa bürosuna açıqlamasında sözügedən “B” planı barədə danışıb.

O bildirib ki, Ukrayna üçün “B” planı iqtisadiyyatın stimullaşdırılması, dövriyyədə olan maliyyə vəsaitinin artırılmasıdır:

“Bu gün biz artıq hərbi istehsal daxil olmaqla müəyyən sahələrin inkişafına şahid oluruq. Söhbət daxili bazarda əldə olunan pullardan gedir. Ukraynada xidmət sektoru da inkişaf edir. Yəni ölkə müharibə şəraitinə uyğunlaşıb. İqtisadiyyatımız daxili bazardan daha çox gəlir əldə edir. Buna uyğun olaraq, maliyyə vəsaiti indi iqtisadiyyatın əsas sahələrinə yatırılır. Buraya ilk növbədə, hərbi istehsal, bu sahədə lokomotiv rolunu oynayan pilotsuz uçuş aparatlarının istehsalı daxildir. Bundan başqa, söhbət həm də raket, mərmi və artilleriya və s. istehsalından gedir.

Bütün bunlarla yanaşı, mühəndislik və təmir sektoru da inkişaf edir. Tərəfdaşlarımızla razılaşacağıq ki, müharibənin genişmiqyaslı, intensiv olması səbəbindən hərbi texnikaların çox tez sıradan çıxdığına görə, təmir işləri Ukrayna ərazisində aparılsın. Bu da iqtisadiyyatın canlanmasına yardım göstərəcək.

Tranzit dəhlizləri, yəni yüklərimizi hara və necə göndərə biləcəyimizlə bağlı düşüncələrimiz var. Həm dəniz yolu, həm də quru yol ilə keçən dəhlizlər var. Bu məsələ ilə bağlı müəyyən müzakirələr gedir. Məsələn, Qərb, xüsusən də Polşa ilə sərhədimizi götürsək, bu istiqamətdə müəyyən müzakirələrin getdiyini söyləyə bilərik. Bütün bunlar öz həllini tapır və biz ixrac-idxal axınının artmasına, iqtisadiyyatın canlanmasına nail oluruq”.

Podolyak onu da qeyd edib ki, Prezident Zelenskinin ABŞ-yə səfərindən sonra Vaşinqtonun yanvardan yardımları davam etdirəcəyi real gözləntidir.