Ukrayna-Rusiya gərginliyi daha da artdı | Döyüşlər dayandırılacaq, yoxsa...?

“Rusiya o mövqedən çıxış edir ki, ATACMS raketləri ilə Rusiya Federasiyasının dərinliklərinə hücum etmək qərarı keyfiyyətcə yeni gərginlik mərhələsi deməkdir”.

Bunu Rusiya Prezidentinin mətbuat katibi Dmitri Peskov bildirib.

“Əgər belə bir qərar həqiqətən verilibsə və Kiyev rejiminə çatdırılıbsa, əlbəttə ki, bu, keyfiyyətcə yeni gərginlik mərhələsidir və ABŞ-nin bu münaqişədə iştirakı baxımından keyfiyyətcə yeni vəziyyətdir”, – deyə Kremlin sözçüsü vurğulayıb.

D.Peskov bildirib ki, Co Bayden başda olmaqla hakimiyyətdən gedən ABŞ administrasiyası Ukraynadakı münaqişəni qızışdırmaqda davam edir.

“Aydındır ki, Vaşinqtonda hakimiyyətdən gedən administrasiya bu münaqişə ətrafında gərginliyi daha da qızışdırmaqla atəşə yağ tökmək üçün addımlar atmaq niyyətindədir”, – deyə D.Peskov bildirib.

Rusiya Prezidentinin mətbuat katibi qeyd edib ki, Rusiyanın dərinliklərinə zərbələri Ukrayna deyil, yalnız Qərb ölkələri endirə bilər. Kreml rəsmisi Ukraynadakı münaqişənin dondurulma ehtimalından da danışıb. O bildirib ki, Ukraynada münaqişənin dondurulması Rusiya üçün qəbuledilməzdir.

“Döyüş xətti boyunca bir növ dondurma variantı, əlbəttə ki, Rusiya tərəfi üçün bu apriori qəbuledilməzdir. Belə olan halda Prezident Vladimir Putin tərəfindən formalaşdırılan iyun şərtləri öz aktuallığını tam saxlayır. Döyüşləri dayandırmaq üçün bunu bərpa etmək lazımdır”, – deyə D.Peskov bildirib.