Ukrayna vəd olunan "F-16"ları ala bilmir

İlin əvvəlində Ukraynaya “F-16” qırıcılarının göndərilməsi ilə bağlı vəd verilsə də, bu proses hələ də reallaşmayıb.

Əvvəlcə təyyarələrin yaya qədər əldə olunacağı deyilirdi, ancaq sonradan ölkə Prezidenti Volodimir Zelenski Avropa səfərində bunun ilin sonunda baş tutacağını bildirdi. Bu yaxınlarda isə müdafiə naziri Oleksiy Reznikov bunun gələn ilə qalacağını açıqlayıb.

Bu müzakirələrə münasibət bildirən Ukrayna Hərbi Hava Qüvvələri Komandanlığının sözçüsü Yuriy İqnat Baku TV-nin Şərqi Avropa bürosuna müsahibəsində təyyarələrin ölkəsinə nə vaxt gəlib çatacağının məlum olmadığını deyib:

“Biz başa düşürük ki, məsələ sadə deyil, həyata keçirmək üçün vaxt lazımdır. Həm ABŞ, həm də Ukraynadan rəsmi açıqlama gəldi ki, pilotlar uçmağa, heyət texnikaya xidmət göstərməyə hazır olan kimi təyyarələr dərhal Ukraynanın hava məkanında peyda olacaq. İndi bizdə hələ hazırlıqlı mütəxəssislər olmadığı halda onları belə şəraitdə hansısa vasitə ilə Ukraynaya köçürmək lazımdırmı? Bununla belə, “F-16” ilə bağlı bütün qərarlar qüvvədədir, ona görə də pilotlarımızın aviasiya koalisiyalarının bir hissəsi olan müxtəlif ölkələrdə müxtəlif obyektlərdə mümkün qədər tez təlim keçmələrini gözləyirik. Ukraynada çoxlu tədbirlər görülməlidir, xüsusən də infrastruktur uyğunlaşdırılmalıdır. Öz mühəndis heyətimizi və digər yerüstü mütəxəssislərimizi hazırlamaq lazımdır ki, biz bu təyyarədən Rusiyaya qarşı müharibədə səmərəli istifadə edə bilək. Bunu istəsələr də, istəməsələr də, biz bu təyyarələri 100 faiz аlacağıq, amma vaxtı, həqiqətən, bilinmir. Hazırda ukraynalıların vaxtı çox sürətlə keçir və biz gündən-günə Rusiyanın hücumları ilə qarşılaşırıq. Bu təyyarələr havada üstünlük əldə etmək, içəridən ölkəni qorumaq, ərazilərimizi azad etmək üçün hər şeyi edəcək. Rusiyanın zəbt etdiyi dənizi də işğaldan azad etməliyik”.

Qeyd edək ki, hazırda Rusiyanın Ukraynada apardığı müharibədə döyüşlər daha qızğın mərhələyə keçir.