Ukraynada bufer zona yaradılacaq

Avropa liderləri Ukrayna ilə Rusiya arasında 40 kilometrlik bufer zona yaradılması ideyasını müzakirə edirlər.

"Politico" nəşri məlumat yayıb ki, bu təşəbbüs sülh sazişi və ya atəşkəs mexanizminin tərkib hissəsi ola bilər.

Layihəyə əsasən, zonanın təhlükəsizliyini təmin etmək üçün 4 mindən 60 minədək hərbçi yerləşdirilməsi nəzərdə tutulur. Əsgərlərin böyük hissəsinin Ukrayna tərəfindən təmin olunacağı, Avropa ölkələrinin isə əlavə dəstək göstərə biləcəyi deyilir.

NATO artıq Rusiyanın gələcək hücumundan alyansın şərq cinahını müdafiə etmək üçün 300 000 əsgərdən ibarət cavab qüvvəsi hazırlamağı düşünür. Məsələ Avropa daxilində fikir ayrılığı yaradıb. Fransa və Böyük Britaniya missiyada liderlik etməyə hazır olsa da, bəzi ölkələr ehtiyatlı mövqedən çıxış edirlər.

Polşanın milli müdafiə naziri Vladislav Kosinyak-Kamısh bildirib ki, “istəklilər koalisiyası”na daxil olan ölkələr Ukraynaya qoşun göndərilməsi məsələsində ortaq razılığa gələ bilmirlər. Onun sözlərinə görə, bəzi dövlətlər, xüsusilə Fransa öz hərbçilərini Kiyevə göndərmək niyyətindədir. Lakin Polşa və NATO-nun şərq cinahına daxil olan digər ölkələr bu addımı atmaq istəmədiklərini və belə bir planlarının olmadığını bəyan ediblər.

“Atlantic” yazır ki, Rusiya Prezidenti Vladimir Putinin bağlı qapılar arxasında amerikalılara nə vəd etdiyi və ABŞ rəsmilərinin Moskva ilə müzakirələrdən nə əldə etdiyi Avropa rəsmilərində çaşqınlıq yaradır. ABŞ bu müzakirələrdə aktiv rol oynamır, yalnız kəşfiyyat və məhdud hava dəstəyi ilə prosesə cəlb oluna biləcəyi ehtimal olunur.