Ukraynada sosial şəbəkələr bloklana bilər | Ali Radadan xəbərdarlıq

Ukraynada son vaxtlar “Telegram” və "TikTok" sosial media resursları da daxil bir sıra şəbəkələrə məhdudiyyətlər tətbiq edilməsi təklif olunur.

Bununla bağlı ölkənin qanunverici orqanı olan Ali Radada qanun layihəsi də irəli sürülüb.

Eyni zamanda bu təşəbbüs fonunda son bir neçə gündə ölkənin informasiya təhlükəsizliyinə təhdid hesab edilən 24 “Telegram” kanalı bağlanıb.

Ali Radanın komitə sədri Yaroslav Yurçişin hazırda iki ssenarini nəzərdən keçirdiklərini bildirib:

“Birincisi, sanksiyaların tətbiqi. Bu variant “Odnoklassniki” və “VKontakte” platformalarında tətbiq edilib. Sonra isə Prezidentin fərmanı ilə Milli Təhlükəsizlik və Müdafiə Şurasının qərarı. İndi ABŞ-də “TikTok”la bağlı sərt qərarlar qəbul edilib. Ukraynada bu, çox güman ki, Rusiyanın təbliğatına xidmət edən şəbəkələrə aid olacaq.

Bu sahədə ən təhlükəli olanlar “Telegram” və “TikTok”dur. Prinsipcə, başqa bir həll yolu var, o da qanuni olaraq bütün sosial şəbəkələri mülkiyyət sistemini göstərməyə məcbur etməkdir. Şəbəkə bunu etmirsə, o zaman Ukraynada qeyri-şəffaf elan edilir və dövlət qurumları üçün məhdudiyyətlər başlayır”.

Qeyd edək ki, Rusiya-Ukrayna müharibəsində son vaxtlar qarşılıqlı hibrid mübarizə ittihamları getdikcə artır. Ölkələr bir-birini həm də dezinformasiya yaymaqda günahlandırır.