Ukraynalı ekspertlər Baku TV-yə nələri danışdı?

Rəsmi Kiyev ABŞ, Almaniya və Böyük Britaniyadan uzun zamandır gözlədiyi icazəni nəhayət ki aldı. Bundan sonra Ukrayna Ordusu qərb raketləri ilə Rusiyanın dərinliklərinə zərbə vura biləcək.

Ekspertlər 2 ildən çoxdur davam edən müharibənin bununla yeni fazaya keçəcəyini proqnozlaşdırırlar.

Ali Radanın Müdafiə və Təhlükəsizlik Komitəsinin sədri Fedor Venislavski Baku TV-nin Şərqi Avropa bürosuna məsələ ilə bağlı Ukraynanın reaksiyasını açıqlayıb.

O bildirib ki, bu, Ukrayna üçün çox yaxşı bir siqnaldır.

“Bu, müttəfiqlərimizin və tərəfdaşlarımızın Ukraynanı mübarizəsində dəstəklədiyinin sübutudur. ABŞ və Avropakı tərəfdaşlarımızdan çoxdan gözlənilən bir addım idi. Düşünürəm ki, bunun nə qədər vacib olduğunu və cəbhədəki vəziyyəti necə dəyişə biləcəyini təhlil etmək üçün Rusiyanın reaksiyasına baxmaq kifayətdir. Onların “Telegram” kanallarından və rəsmi bəyanatlarından göründüyü kimi, reaksiya kifayət qədər isterikdir. Onlar Ukraynanın Rusiyanın dərinliklərinə zərbələr endirə biləcəyindən qorxurlar”, – F.Venislavski əlavə edib.

Hərbi analitik Svetlana Kuşnir isə deyir ki, bu kimi icazə Ukraynaya geniş imkanlar tanısa da, təəssüf ki hərbi arsenalın miqyası adekvat deyil.

“Ukraynanın belə bir icazəsinin olmasına baxmayaraq, bunu həyata keçirmək üçün kifayət qədər arsenalımız yoxdur. Biz bunu ancaq qənaətlə, imkanımız çatan qədər həyata keçirə bilərik. Əsas hədəflər isə Rusiyanın daxilindəki raket və digər artilleriya bazalarıdır. Rus ordusu bunlarla Ukraynaya zərbələr endirir. Ukraynanın lazımi ehtiyata yiyələnib, verilmiş icazədən istifadə edərək reallığı dəyişə bilməsi məsələsinə gəldikdə, düşünürəm ki, bu, ən azı Rusiyanın danışıqlarla bağlı hazırkı mövqeyinin dəyişməsinə səbəb ola bilər”, – o vurğulayıb.

Qeyd edək ki, artıq 4-cü gündür Rusiyanın Ukrayna ərazisinə kütləvi hava hücumları davam edir. Zərbələr nəticəsində ölkədə yenidən enerji böhranı yaranıb.