Vasili Anisimov Rusiya vətəndaşlığından imtina etdi | "Forbes"dən açıqlama

“Coalco International” şirkətinin keçmiş sahibi, milyarder Vasili Anisimov Rusiya vətəndaşlığından imtina edib.

Bu barədə "Forbes" jurnalı biznesmenin təqdim etdiyi sənədlərə istinadən məlumat yayıb.

Bildirilib ki, Əlişir Usmanovun keçmiş ortağı olan V.Anisimov bununla da Rusiya vətəndaşlığından imtina edən yeddinci milyarder olub.

Nəşrdə qeyd olunub ki, o, hələ 2022-ci ilin dekabrında Xorvatiya vətəndaşlığını alıb və həmin vaxtdan etibarən Rusiya ərazisinə yalnız işgüzar vizası ilə daxil olub. Xəbərə görə, bu barədə biznesmenin Böyük Britaniyadakı Şirkətlər Evinə müraciət etdiyi bildirişdə qeyd edilib.

Bundan əlavə, milyarderdə 1990-cı illərdə aldığı Dominikan Respublikasının vətəndaşlığı da var.

Qeyd edək ki, "Forbes" jurnalı Vasili Anisimovun sərvətini 1,6 milyard dollar dəyərində qiymətləndirib.