Vaşinqton geri çəkilir? | Rusiyanın təhdidlərinə ABŞ rəsmisindən cavab - Baku TV

“ABŞ diplomatları Ukraynanı tərk etməyəcək, Vaşinqton isə Kiyevə dəstəyini davam etdirəcək”.

Bu barədə ABŞ senatoru Riçard Blumental amerikalı iş adamı və siyasətçi Ceyms Hayms ilə Kiyevə səfəri zamanı jurnalistlərə açıqlamasında bildirib.

O qeyd edib ki, Rusiyanın təhdidləri ABŞ və Ukraynanı qorxutmayacaq:

“Diplomatlarımız Ukraynanı tərk etmir. Onlar buradadırlar. Biz qorxmuruq. Kiyevə yardımları dayandırmayacağıq. Rusiyanın raket və dron hücumlarını artırdığı bir vaxtda Ukraynanın əlavə ABŞ istehsalı olan “Patriot” hava hücumundan müdafiə sistemləri ilə bağlı müraciətlərini dəstəkləyirik. Məqsəd mülki insanların həyatını qorumaqdır. Bombalanmış ticarət mərkəzini, dağıdılmış yaşayış binalarını görəndə Putinin qadınları, uşaqları və digər mülki şəxsləri hədəf aldığı aydın olur”.

Ceyms Hayms isə öz növbəsində qeyd edib ki, hansı silah sistemlərinin veriləcəyi ilə bağlı yekun qərar hələ məlum deyil, lakin Konqres daha çox dəstək göstərilməsinin tərəfdarıdır.

Onun sözlərinə görə ABŞ Konqresi Ukraynaya əlavə hərbi yardımın, xüsusilə də ballistik raketləri vurmağa qadir hava hücumundan müdafiə sistemlərinin göndərilməsi üçün öz səylərini davam etdirir.

Bu arada, Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas amerikalıların Kiyevi tərk etdiyini bildirsə də, sonradan bu ifadə onun şərhlərinin rəsmi mətnindən çıxarılıb.