Xameneinin müşaviri ABŞ-ni sərt tənqid etdi | SEPAH ABŞ-yə ultimatum verdi - Baku TV

İranın ali rəhbəri Xameneinin hərbi müşaviri Möhsün Rzayi ABŞ-ni sərt tənqid edərək, Tehranın Amerika hərbi qüvvələrinə qarşı ciddi cavab verə biləcəyini bildirib.

Bu barədə o, “X” sosial şəbəkəsində paylaşım edib.

Rzayi ABŞ-ni dünyada aviadaşıyıcıları olan yeganə pirat adlandıraraq qeyd edib ki, İranın quldurlarla mübarizə qabiliyyəti onun hərbi gəmiləri batırmaq imkanları ilə eyni səviyyədədir.

“ABŞ dünyada aviadaşıyıcıları olan yeganə piratdır. Bizim piratlarla mübarizə imkanlarımız döyüş gəmilərini batırmaq qabiliyyətimizdən geri qalmır. Gəmilərinizin və qüvvələrinizin qəbiristanlığa çevriləcəyinə hazır olun”, – deyə o vurğulayıb.

SEPAH isə Vaşinqtonun çıxılmaz vəziyyətdə olduğunu iddia edib. Bildirilib ki, Tramp “qeyri-mümkün əməliyyat” ilə “pis razılaşma” arasında seçim etmək məcburiyyətində qalıb.

Açıqlamada mövcud vəziyyəti xarakterizə edən dörd əsas amil sadalanıb: İranın mühasirəyə qarşı Pentaqona verdiyi ultimatum, Çin, Rusiya və Avropanın Vaşinqtona qarşı ritorikasının dəyişməsi, Trampın Konqresə göndərdiyi və “passiv məzmunlu” kimi qiymətləndirilən məktub, həmçinin İranın irəli sürdüyü müzakirə şərtlərinin qəbul edilməsi.

SEPAH-ın bəyanatında qeyd olunur ki, bütün bu proseslər tək bir məna kəsb edir: “Tramp ya reallaşdırılması qeyri-mümkün olan hərbi əməliyyata başlamalı, ya da İranla “pis” hesab olunan razılaşmaya imza atmalıdır”.

Açıqlamanın sonunda ABŞ administrasiyasının qərarvermə imkanlarının ciddi şəkildə məhdudlaşdığı vurğulanıb.