Xəzərə hücuma görə Moskva və Aşqabaddan Ukraynaya xəbərdarlıq - Baku TV

Rusiya Prezidentinin mətbuat katibi Dmitri Peskov Ukrayna Silahlı Qüvvələrinin Xəzər dənizində gəmilərə endirdiyi zərbələri "son dərəcə təhlükəli" adlandırıb.

Peskov jurnalistlərə açıqlamasında diqqətə çatdırıb ki, bu cür hücumlar regionda gərginliyin növbəti mərhələsidir.

Onun sözlərinə görə, Ukraynanın Xəzər dənizində gəmilərə zərbələr endirməsi döyüş əməliyyatlarının coğrafiyasının genişləndirilməsi tendensiyasını göstərir.

Türkmənistan da məsələyə münasibət bildirib. Rəsmi Aşqabad Xəzər dənizindəki gəmilərə endirilən zərbələri pisləyib və bu cür hərəkətləri qəbuledilməz adlandırıb.

"Xəzəryanı dövlət və BMT tərəfindən tanınan daimi neytrallığa malik bir ölkə olaraq Türkmənistan Xəzər dənizinin sülh, harmoniya və mehriban qonşuluq dənizi olduğunu vurğulayır", – deyə Xarici İşlər Nazirliyinin bəyanatında qeyd olunub.

Xatırladaq ki, iyulun 25-də İran Ukraynanı Xəzər dənizində İranın ticarət gəmisinə zərbə endirməkdə ittiham edib. İran Xarici İşlər Nazirliyi hadisə nəticəsində ölən və xəsarət alanların olduğunu açıqlayıb və Ukraynanın müvəqqəti işlər vəkilinə etiraz notası təqdim edib. Ukrayna Prezidenti Volodimir Zelenski isə Ukrayna Silahlı Qüvvələrinin Rusiya ilə İran arasında hərbi yüklərin daşınmasında istifadə olunduğunu iddia etdiyi gəmilərə zərbələr endirdiyini diqqətə çatdırıb.