Zaxarovadan Ermənistana şillə kimi cavab | Ermənistan öz xalqına xəyanət edir

“Ararat Mirzoyan kimi adamlar Ermənistanı çıxılmaz vəziyyətə salırlar”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova keçirdiyi brifinqdə deyib.

O, News.ru-nun Ermənistanın xarici işlər nazirinin “Rusiya və Ermənistan müxtəlif dillərdə danışırlar” açıqlaması ilə bağlı sualını şərh edərkən bildirib:

“Ararat Mirzoyan kimi adamlar Ermənistanı çıxılmaz vəziyyətə salırlar. Söhbət A.Mirzoyanın Argentina mətbuatına verdiyi müsahibədən gedir. O, Rusiya ilə Ermənistan arasında diplomatik münasibətlərin sonlandırılmasına dair sualı cavablandırarkən bildirib ki, gələcəklə bağlı açıqlama verə bilməz. Adətən hakimiyyətdə olan siyasətçilər yalnız gələcəyi proqnozlaşdırmır, onu yaradırlar.

Ararat Mirzoyanın Ermənistan və Rusiya arasında diplomatik münasibətlərin qurulmasının ildönümü ərəfəsində səsləndirdiyi bu fikirlər müəmmalıdır. Həmin müsahibədə bildirilib ki, indi İrəvanın əsas müttəfiqləri ABŞ və Avropa İttifaqıdır.

Soruşmaq olarmı ki, indi, yəni nə vaxt? 2024-cü ilin mart-aprel ayı? Bundan əvvəl və sonra tarix bitir? Ermənistan hökuməti Rusiya və digər yaxın müttəfiqləri ilə münasibətləri Avropa İttifaqı və ABŞ-ni şirnikləndirən müvəqqəti bonuslar naminə qurban verir”.

Mariya Zaxarova onu da əlavə edib ki, Ermənistan Rusiyaya və ya tərəfdaşlarına, müttəfiqlərinə deyil, öz xalqına xəyanət edir.