Zelenskidən müharibə barədə təcili açıqlama | Bu, asan olmayacaq

“ABŞ yeni prezident Donald Trampın dövründə Ukraynaya hərbi yardımı kəsmək qərarına gəlsə, o zaman müharibədə uduzacağıq”.

Bunu Ukrayna Prezidenti Vladimir Zelenski ABŞ-nin “Foks Nyus” kanalına müsahibəsində deyib.

“Əgər kəssələr, məncə, uduzacağıq. Təbii ki, hər halda mübarizəmizi davam etdirəcəyik. Bizim öz istehsalımız var, ancaq üstünlüyə malik olmaq üçün kifayət deyil. Məncə, sağ qalmaq üçün də kifayət deyil. Amma ABŞ-nin seçimi bu olsa, o zaman nə etməli olduğumuza qərar verəcəyik”, – V.Zelenski bildirib.

“Trampın Rusiya Prezidenti Putinə təsir edəcəyinə və müharibəni dayandıracağına inanırsınızmı” sualına Zelenski belə cavab verib:

“Bu, asan olmayacaq, amma ABŞ bütün rıçaqlarından istifadə etsə, bəli, bunu edə bilər. Çünki o, Putindən qat-qat güclüdür. ABŞ daha güclüdür. Onların iqtisadiyyatı güclüdür. ABŞ prezidentinin gücü və silahı var və o, enerji resurslarının qiymətlərini aşağı sala bilər. Yeri gəlmişkən, mətbuatda Prezident Trampdan siqnallar eşitdim ki, o, enerji resurslarının və neftin qiymətlərini azaltmaq barədə düşünür, bunu etmək lazımdır”.