20 yaşlı İlahəni qətlə yetirən qardaşına hökm oxundu | Bakıda dəhşətli cinayət

Paytaxtın Sulutəpə qəsəbəsində bacısını boğaraq qətlə yetirən Həsən Kərimovun cinayət işi üzrə məhkəmə istintaqı yekunlaşıb.

Bakı Ağır Cinayətlər Məhkəməsinin hakimi Telman Hüseynovun sədrliyi ilə keçirilən prosesdə təqsirləndirilən şəxs barəsində qərar qəbul olunub.

Məhkəmənin qərarı ilə Həsən Kərimova qarşı tibbi xarakterli məcburi tədbirlər tətbiq edilib.

Məlum olub ki, təqsirləndirilən şəxs doğuş zamanı aldığı travma ilə əlaqədar uşaq ruhi dispanserində müalicə alıb. Onun cinayət əməlini törədərkən anlaqlı vəziyyətdə olduğu müəyyən edilsə də, əməli törətdikdən sonra mövcud olan davranış pozuntuları kəskinləşdiyi üçün məcburi müalicəyə cəlb edilməsi tövsiyə olunub.

Qeyd edək ki, dövlət ittihamçısı Valeh Ələkbərov ittiham nitqi ilə çıxış edərək məhkəmədən təqsirləndirilən şəxsin 16 il müddətinə azadlıqdan məhrum edilməsini istəyib.

Xatırladaq ki, 2023-cü il oktyabrın 12-də saat 23 radələrində 2003-cü il təvəllüdlü İlahə Kərimovanın ölməsi barədə Binəqədi Rayon Prokurorluğuna məlumat daxil olub.

Araşdırmalarla 2004-cü il təvəllüdlü Həsən Kərimovun Binəqədi rayonu, Sulutəpə qəsəbəsi ərazisində yerləşən fərdi yaşayış evlərindən birində aralarında yaranan mübahisə zamanı bacısı İlahə Kərimovanı boğaraq qəsdən öldürməsinə dair əsaslı şübhələr müəyyən edilib.

Həsən Kərimova qarşı Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə ittiham irəli sürülüb. Qətlə yetirilən 20 yaşlı İlahə Kərimova Dövlət Pedaqoji Kollecinin tələbəsi olub.