Ağstafada faciəvi hadisə | Uzunqulaq arabası qəzaya düşdü

Ağstafada qəza nəticəsində azyaşlı ölüb, babası isə ağır vəziyyətdə xəstəxanaya yerləşdirilib.

Hadisə rayonun Köçəsgər kəndində qeydə alınıb.

Belə ki, günün qaranlıq vaxtında uzunqulaq arabası ilə yaşadığı kəndə qayıdan 52 yaşlı Ələmdar İsmayılov nəvəsi ilə bərabər avtomobil qəzasına düşüb. Avtomobilin arabanı arxadan vurması nəticəsində 7 yaşlı Əziz Tağıyev hadisə yerində ölüb. Yaralı Ələmdar İsmayılov Ağstafa Rayon Mərkəzi Xəstəxanasına çatdırılıb.

Xəstəxanadan verilən məlumata görə, 52 yaşlı yaralı hər iki baldır sümüyünün orta üçdə birinin açıq yerdəyişməli sınığı diaqnozu ilə xəstəxanaya daxil olub. İlkin tibbi yardımdan sonra xəstəyə qan köçürülüb. Bununla belə onun vəziyyəti ağır olaraq qiymətləndirilir .

7 yaşlı Əziz Tağıyevin meyiti isə ekspertiza olunması üçün məhkəmə-tibbi ekspertizasının Ağstafa rayon şöbəsinə gətirilib. Burada nümunələr götürüldükdən sonra azyaşlının meyiti ailəsinə təhvil verilib.

Faktla bağlı Ağstafa Rayon Polis Şöbəsində araşdırma aparılır.