Ana 2 aylıq övladından niyə imtina etdi? | Körpənin aqibəti necə olacaq? - Baku TV

Gəncə şəhərindəki yataqxanalardan birində məskunlaşan 21 yaşlı şəhər sakini ötən ilin dekabr ayında dünyaya gətirdiyi qız övladını böyütməkdən imtina edib.

O bununla bağlı müvafiq qurumlara müraciət edib. Ana ona övladını böyütmək üçün təklif olunan dəstəklərdən imtina etdiyinə görə körpə Gəncə Uşaq Xəstəxanasına yerləşdirilib.

Tibb müəssisəsindən verilən məlumata görə, hazırda körpənin müalicəsi xəstəxananın müvafiq şöbəsində davam etdirilir, vəziyyəti stabildir.

Məsələ ilə əlaqədar Sosial Xidmətlər Agentliyindən bildirilib ki, sözügedən körpə ilə bağlı müraciət 2026-cı ilin yanvar ayında daxil olub. Müraciətdə körpənin anası müxtəlif səbəblərdən qızına qayğı göstərə bilmədiyini və onun uşaq müəssisələrindən birinə yerləşdirilməsini xahiş edib.

Agentliyin əməkdaşları ilkin qiymətləndirmə məqsədilə dərhal ananın yaşadığı ünvana səfər ediblər. Qiymətləndirmə zamanı anaya övladına özünün qayğı göstərməsi üçün sosial dəstək tədbirləri ilə əhatə olunması təklif edilsə də, o bundan imtina edib. Bundan sonra körpə müvafiq tibbi müayinələrə yönləndirilib. Uşağın müayinə və qiymətləndirmə prosedurları bitdikdən sonra o, daimi qayğı ilə əhatə olunması üçün körpələr evinə yerləşdiriləcək.