Ata qızını vəhşicəsinə qətlə yetirdi | Tükürpərdici hadisənin detalları

Bakıda qızını öldürməkdə təqsirləndirilən Yelmar Atakişiyevin cinayət işinin məhkəmə araşdırması yekunlaşıb.

Bakı Ağır Cinayətlər Məhkəməsinin hakimi Elnur Nuriyevin sədrliyi ilə keçirilən sonuncu prosesdə təqsirləndirilənə hökm oxunaraq o, 16 il azadlıqdan məhrum edilib.

Xatırladaq ki, ötən prosesdə dövlət ittihamçısı təqsirləndirilənin 17 il azadlıqdan məhrum edilməsini məhkəməyə təklif etmişdi.

Qeyd edək ki, hadisə 2024-cü ilin noyabrın 10-da Bakının Zabrat qəsəbəsində baş verib. Qəsəbə ərazisində yaşayan 42 yaşlı Cəmalə Atakişiyevanın yaşadığı evdə qətlə yetirilməsi ilə bağlı polisə məlumat daxil olub. Mərhumun atası Yelmar Atakişiyev şübhəli şəxs qismində saxlanılaraq istintaqa cəlb edilib.

Təqsirləndirilən ifadəsində qeyd edib ki, həbsxanada olduğu müddətdə qızı barədə xoşagəlməz məlumatlar alıb və buna görə dəfələrlə bu söz-söhbətlərə son qoymaq üçün övladına xəbərdarlıq edib.

Yelmar Atakişiyev həbsdən çıxdıqdan sonra qızı ilə bu məsələni müzakirə edərkən onun gizli şəkildə ikinci telefonu işlətdiyi məlum olub. Yelmar bunun səbəbini soruşduqda isə Cəmalə atasına onun işinə qarışmamağı tövsiyə edib.

Bundan sonra hiddətlənən Y.Atakişiyev əl və ayaq zərbələri ilə qızına ağır xəsarətlər yetirib. Cəmalə Atakişiyeva aldığı xəsarətlərdən hadisə yerində dünyasını dəyişib.

İstintaq tərəfindən ona qarşı Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə ittiham irəli sürülüb.