Atası qışqırdı ki, niyə vaxtında demədin | Məktəbdə dəhşətli hadisənin detalları

Xaçmazda məktəbdə xoşagəlməz hal yaşanıb.

Rayonun Qusarçay kənd tam orta məktəbində fiziki tərbiyə müəllimi işləyən 60 yaşlı Təbriz Adıgözəlovun dərs zamanı səkkizinci sinif şagirdi olan qıza qarşı qiymət yazmaq qarşılığında qeyri-etik davrandığı iddia olunur.

“Uşaq ağlayırdı, heç nə yoxdur deyirdi. Atası da qışqırıb ki, niyə vaxtında ona deməyib. Səhər isə mənə, anasına hər şeyi açıqladı”, – məktəblinin nənəsi söyləyib.

Məsələ ilə bağlı Xaçmaz rayon təhsil sektorunun əməkdaşı İmran Müseyibov bildirib ki, aparılan araşdırma nəticəsində məlumatı əldə edən məktəbin direktor müavini və psixoloq tərəfindən həmin şagirdlə söhbət aparılıb:

“Bundan sonra da müvafiq olaraq hüquq-mühafizə orqanlarına məlumat verilib. Sözügedən müəllimin özü işdən çıxmaq üçün müraciət edib və onunla bağlanmış əmək müqaviləsinə xitam verilib. Eyni zamanda məktəbin direktor səlahiyyətlərini icra edən direktor müavini də işdən çıxmaq üçün öz ərizəsini təqdim edib”.

Məsələ ilə bağlı Xaçmaz Rayon Polis Şöbəsinə müraciət olunub. Tərəflərin izahatı alınıb, hadisənin detalları araşdırılır.