Bakıda aktyor və arvadının qətlində dəhşətli fakt | Təqsirləndirilən şəxs elə şey dedi ki...

Paytaxtda aktyor İosif Tkaç və onun həyat yoldaşı Lyudmila Tkaçı qətlə yetirməkdə təqsirləndirilən İslam Hadıyevin cinayət işinin növbəti məhkəmə prosesi keçirilib.

Bakı Ağır Cinayətlər Məhkəməsinin hakimi Azər Tağıyevin sədrliyi ilə baş tutan prosesin ilkin mərhələsində təqsirləndirilən şəxsin ifadələrindəki ziddiyyətlər müzakirə predmeti olub.

İslam Hadıyev həm ibtidai istintaqda, həm də məhkəmə proseslərindəki sərbəst ifadələri zamanı qətlə yetirilən aktyorun evindən oğurladığı 50 min manatı əvvəlcə Salyan rayonunda özünə məxsus evdə basdıraraq gizlətdiyini bildirib.

Daha sonra isə həmin pulun valyuta olan hissəsini manata dəyişərək "Kia Sportage" markalı avtomobil aldığını desə də, sonradan bu ifadəsini danıb.

Məhkəmədə sonuncu ifadəsi zamanı o, aktyor və onun həyat yoldaşını tamah məqsədilə yox, ona hücum etdiklərinə görə qorxduğundan öldürdüyünü bildirib. Onların evindən 50 min manatın oğurlaması faktını da danaraq avtomobili ustalıqdan qazandığı pulla aldığını deyib.

Prokurorun ona ünvanladığı suallara isə İslam Hadıyev qeyri-səmimi cavab verib. Daha sonra məhkəmə istintaqı yekunlaşaraq sənədlərin tədqiqi mərhələsinə start verilib. Məhkəmənin növbəti prosesi aprelin 10-da davam edəcək.

Qeyd edək ki, hadisə 2024-cü ilin oktyabrın 22-də saat 21 radələrində paytaxtın Nəsimi rayonunda baş verib. 1973-cü il təvəllüdlü İslam Hadıyevin tamah məqsədilə yaşadıqları evdə 1939-cu il təvəllüdlü İosif Tkaç və arvadı 1944-cü il təvəllüdlü Lyudmila Tkaçı qəsdən öldürməsinə əsaslı şübhələr müəyyən edilib.

Qətlə yetirilən İosif Tkaç 1997-ci ildən Səməd Vurğun adına Rus Dram Teatrında aktyor vəzifəsində çalışıb. Cinayət hadisəsini törətməkdə şübhəli bilinən İslam Hadıyev aktyorun evində əvvəllər usta kimi işləyib və bu müddət ərzində də yaşlı ər-arvadın etibarını qazanıb.

Aktyor evindən oğurlanan 50 min manata görə İslam Hadıyevi ittiham edib. Münaqişə də elə bundan sonra başlayıb. İosif Tkaç və arvadı Lyudmila Tkaç pulu qaytarmayacağı təqdirdə İslam Hadıyevdən polisə şikayət edəcəklərini bildiriblər.

İslam Hadıyev onların yaşadıqları mənzilə gələrək ər-arvadı öldürüb və daha sonra Salyan rayonuna qaçıb. Salyan rayonunda polis əməkdaşları tərəfindən saxlanılıb.

Onu da qeyd edək ki, aktyorla yanaşı, qətlə yetirilən həyat yoldaşı Lyudmila Tkaç respublikanın tanınmış pedaqoqlarından biri olub. Təqsirləndirilən barədə Cinayət Məcəlləsinin 120.2.5 və 120.2.7-ci (tamah məqsədilə iki və ya daha çox şəxsi öldürmə) maddələri ilə cinayət işi açılaraq barəsində ittiham irəli sürülüb.