Bakıda dəhşətə gətirən hadisə | "Maşına mindirdi, benzini üstünə töküb..." - Baku TV

Bakıda bacısının keçmiş ərini yandıraraq öldürməkdə təqsirləndirilən Məhərrəm Hüseynzadənin barəsindəki cinayət işi üzrə məhkəmə araşdırması yekunlaşıb.

Bakı Ağır Cinayətlər Məhkəməsinin hakimi Aytən Əliyevanın sədrliyi ilə keçirilən yekun iclasda hökm oxunub.

Təqsirləndirilən şəxs 16 il müddətinə azadlıqdan məhrum edilib.

Qeyd edək ki, hadisə 2025-ci ilin mayın 29-da Bakının Nizami rayonunda baş verib. Məhərrəm Hüseynzadə ailə üzvləri ilə birlikdə yaşadıqları Nizami rayonu, Fərzəliyev küçəsi 2 ünvanında olan zaman bacısının keçmiş əri Zəhmət Əhmədov sərxoş halda həmin ünvana gələrək səs-küy yaradıb. Bina sakinlərinin narahat olmaması üçün Məhərrəm Hüseynzadə keçmiş yeznəsini oradan uzaqlaşdırmaq məqsədilə özünə məxsus BMW markalı avtomobilinə əyləşdirib.

Məhərrəm Hüseynzadə yolda aralarında yaranan mübahisə zamanı Zəhmət Əhmədovun söyüşlərindən hiddətlənərək avtomobili yanacaqdoldurma məntəqəsinə sürüb. O, plastik qaba yanacaq dolduraraq bir qədər uzaqlaşdıqdan sonra benzini Zəhmət Əhmədovun üzərinə töküb və od vurub. Zərərçəkən bir gündən sonra müalicə aldığı Nərimanov Tibb Mərkəzinin Yanıq şöbəsində həyatını itirib.

Məhərrəm Hüseynzadə həbs olunaraq ona qarşı Cinayət Məcəlləsinin 120.2.4. (qəsdən adam öldürmə – xüsusi amansızlıqla və ya ümumi təhlükəli üsulla adam öldürmə) maddəsi ilə ittiham irəli sürülüb.