Bakıda gənc oğlanı qətlə yetirən şəxs hakim qarşısında | Məhkəmədən görüntülər

Paytaxtda qətl törətməkdə təqsirləndirilən Elşən Nəbiyevin cinayət işinin məhkəmə hazırlıq iclası keçirilib.

Bakı Ağır Cinayətlər Məhkəməsinin hakimi Siyavuş Hacıyevin sədrliyi ilə keçirilən prosesdə müttəhimin anket məlumatları dəqiqləşdirilib.

Təqsirləndirilən şəxsin vəkili vəsatət qaldıraraq müvəkkilinin həbs qətimkan tədbirinin ev dustaqlığı ilə əvəz edilməsini istəyib. Zərərçəkmiş şəxsin vəkili isə vəsatət qaldıraraq cinayət işinin yenidən ibtidai istintaqa qaytarılmasını və təqsirləndirilən şəxs barəsində daha ağır maddələrin təyin edilməsini istəyib.

Bundan sonra çıxış edən prokuror Cövdət Mehrəliyev cinayət işinin məhkəmə baxışına verilməsini təklif edib. Məhkəmə qısa müşavirədən sonra hər iki tərəfin vəsatətlərini təmin etməyib. Eyni zamanda işin məhkəmə istintaqına verilməsi ilə bağlı qərar qəbul edilib. Məhkəmənin ilk baxış iclası avqustun 2-nə təyin edilib.

Qeyd edək ki, hadisə 2023-cü ilin dekabrında paytaxtın Nərimanov rayonu ərazisində qeydə alınıb. Araşdırmalarla 1975-ci il təvəllüdlü Elşən Nəbiyevin şəxsi münasibətlər zəminində 1990-cı il təvəllüdlü Etibar Əliyevi bıçaqlayaraq qətlə yetirməsinə əsaslı şübhələr müəyyən edilib.

Cinayət əməlini törətməkdə şübhəli bilinən Elşən Nəbiyev polis əməkdaşları tərəfindən keçirilən tədbirlərlə saxlanılıb. Ona qarşı Cinayət Məcəlləsinin 120.1-ci, qəsdən adam öldürmə maddəsi ilə ittiham irəli sürülüb.