Bankdan 316 min manat oğurlandı

Bakıda bankdan külli miqdarda pul oğurlanıb. Hadisə “BTB Bank” Açıq Səhmdar Cəmiyyətinin Xətai rayonu, Yusif Səfərov küçəsi 21 ünvanındakı ofisində qeydə alınıb.

“Report”un məlumatına görə, martın 17-si saat 18:00 radələrində müştərilərin sözügedən bankın depozit otağına yerləşdirdiyi 316 min manat və 32 min dollar aparılıb.

Araşdırmalar zamanı 33 yaşlı Qrinkeviç Sergey Oleqoviç və 47 yaşlı Babayev Aleksey Ramizoviç müştərilərə məxsus külli miqdarda nağd pulu oğurlamaqda şübhəli biliniblər.

Faktla bağlı Xətai Rayon Polis İdarəsində Cinayət Məcəlləsinin “oğurluq, külli miqdarda ziyan vurmaqla törədildikdə” maddəsi ilə cinayət işi başlanaraq istintaq araşdırmaları aparılır.