Biləsuvarda 44 yaşlı kişinin ölümündə şübhəli bilinən 16 yaşlı yeniyetmə tutuldu - Baku TV

Biləsuvar rayonunun Dərvişli kəndində qətl hadisəsi baş verib.

Hadisə şahidlərinin bildirdiyinə görə, eyni kənddən olan 16 yaşlı yeniyetmə və 44 yaşlı Şölət Rüstəmli arasında bir gün əvvəl mübahisə yaranıb. Söhbətlərinə aydınlıq gətirmək üçün onlar avqustun 13-də axşam saatlarında kənddə dükanın qarşısında görüşüblər. Bu zaman yeniyetmə bıçağa əl ataraq həmkəndlisini bıçaqlayıb.

Bıçaq xəsarəti alan Şölət Rüstəmlini kənd sakinləri onun özünə məxsus nəqliyyat vasitəsinə qoyaraq Biləsuvar Rayon Mərkəzi Xəstəxanasına aparıblar. Buna baxmayaraq, o, yolda həyatını itirib.

Kənd sakinlərinin sözlərinə görə, tərəflər yaxın qohum olublar və əvvəllər aralarında hər hansı ciddi problem yaşanmayıb.

“İkisi də yaxın qohum idi. Həmişə də mehriban olublar. Hadisənin hansı səbəbdən baş verdiyi məlum deyil. Hər iki ailə nümunəvi ailə idi, əvvəllər heç bir narazılıqları olmayıb. Mərhum Rusiyada işləyirdi, üç-dörd gün əvvəl kəndə qayıtmışdı. Ailəli idi, iki övladı var idi”, – deyə kənd sakini bildirib.

Meyit daxili və xarici müayinə olunması üçün Məhkəmə-Tibbi Ekspertiza və Patoloji Anatomiya Birliyinin Biləsuvar Rayon Şöbəsinə təhvil verilib.

Münaqişə zəminində həmin cinayət əməlini törətməkdə şübhəli bilinən 16 yaşlı yeniyetmə polis əməkdaşları tərəfindən saxlanılaraq istintaqa təhvil verilib. Hadisənin təfərrüatları dəqiqləşdirilir.

Faktla bağlı Biləsuvar Rayon Prokurorluğunda araşdırma aparılır.