Biləsuvarda ailədaxili münaqişə qanla bitdi

Biləsuvarda gənc qadın qətlə yetirilib. Hadisə Xırmandalı kəndində baş verib.

Belə ki, martın 26-da günorta saatlarında 25 yaşlı Sevil Əlilinin öldürülməsi barədə Rayon Prokurorluğuna məlumat daxil olub.

Araşdırma zamanı 27 yaşlı Anar Məmiyevin kəsici-deşici alətlə həyat yoldaşı Sevil Əlilini qəsdən öldürməsinə əsaslı şübhələr müəyyən edilib. Hadisədən sonra Anar Məmiyev könüllü olaraq polisə təslim olub. O, şübhəli şəxs qismində saxlanılıb.

Hadisənin ilkin təfərrüatları da məlum olub. Belə ki, 2 azyaşlı övladı olan ailə yeni tikdikləri evə köçməyə hazırlaşırmış. Bu məqsədlə Sevil Əlili evin son təmizliyini etmək və köçmək üçün Bakıda işləyən həyat yoldaşına zəng edərək onu kəndə çağırıb. Təzə evdə səbəbi məlum olmayan mübahisə zamanı Anar Məmiyev həyat yoldaşının üzünə bıçaq zərbəsi endirib. Sonra onu elə təzə evin tavanından asıb.

Faktla bağlı Cinayət Məcəlləsinin qəsdən adam öldürmə maddəsi ilə cinayət işi başlanılıb. Araşdırmalar davam etdirilir.