Cəlilabadda qeyri-adi hadisə ilə bağlı TƏBİB-dən açıqlama

Cəlilabadda qeyri-adi hadisə baş verib. Belə ki, morqa meyit kimi gətirilən şəxsin əslində sağ olduğu məlum olub.

Məlumata görə, hadisə rayonun Tahirli kəndində qeydə alınıb. Kənd sakini, 34 yaşlı Xəyal Quliyev intihara cəhd edərək özünü asıb.

O, Məhkəmə-Tibbi Ekspertiza və Patoloji Anatomiya Birliyinin Cəlilabad rayon şöbəsinə təhvil verilib. Hadisə yerinə polis əməkdaşları cəlb olunub.

Araşdırmalar zamanı Xəyal Quliyevin ölmədiyi, komatoz vəziyyətdə olduğu müəyyən edilib. Dərhal xəstəxanaya çatdırılan yaralıya zəruri tibbi müdaxilələr olunub.

Həmin şəxsin vəziyyəti səhhəti ilə bağlı TƏBİB də açıqlama verib.

Bildirilib ki, martın 15-də saat 12 radələrində 1991-ci il təvəllüdlü (kişi cinsli) şəxs mexaniki asfiksiya diaqnozu ilə Xəstəxananın Təcili tibbi yardım şöbəsinə hospitalizasiya olunub. Ona zəruri tibbi yardımlar göstərilib. Hazırda vəziyyəti stabildir, müalicəsi reanimasiya şöbəsində davam etdirilir.