Çin vətəndaşları Bakıda villadan oğurluq etdilər

Sumqayıtda villadan külli miqdarda oğurluq edən Çin vətəndaşları 44 yaşlı Wei Zhinjian və 34 yaşlı Wei Hongfunun məhkəmə prosesi başa çatıb.

Sumqayıt Ağır Cinayətlər Məhkəməsinin hökmünə əsasən, Wei Zhinjian 7 il 6 ay, onunla cinayət əlaqəsinə girən tanışı isə 2 il müddətinə azadlıqdan məhrum edilib.

Onlar evdəki dəmir seyfdən 134 min 500 dollar, 10 min manat pul və qiymətli qızıl-zinət əşyaları aparmaqla zərərçəkənə ümumilikdə 357 min 194 manat dəyərində ziyan vurublar.

Məhkəmədə Wei Hongfu ifadəsində bildirib ki, Bakıya işləmək üçün gəliblər:

“Wei He bizi işləmək üçün Bakıya çağırmışdı. O bizə iş tapmaq üçün ikimizin də pasportunu götürdü, lakin bizə iş tapa bilmədiyinə görə evdən oğurluq etməyimizi istədi. Wei He bizə evə girib axtarmağı, nəsə bir şey varsa, götürməyi və əgər dediyini etməsək, pasportlarımızı geri qaytarmayacağını söylədi.

Evə girdikdən sonra seyf də daxil olmaqla tapdığımız hər şeyi götürdük. Daha sonra seyfi açdılar və içərisində də nə var idisə, hamısını götürdük. Wei He bizə təxminən 80 min dollar pul verdi və Dubaya getməyimizi söylədi. Bundan sonra hava limanına getdik və bizi tutdular”.