“Çox yaxşı adam idi” | Bakıda ər və arvad amansızlıqla öldürüldü - Baku TV

Sabunçu rayonunun Bakıxanov qəsəbəsində iki nəfərin qətlə yetirilməsi ilə nəticələnən ağır cinayət hadisəsi qeydə alınıb.

Hadisə fərdi yaşayış evində baş verib. Belə ki, həmin evdə yaşayan 80 yaşlı Sabir Əliyev və 60 yaşlı həyat yoldaşı Zöhrə Əliyeva qonşuluqda yaşayan 29 yaşlı Murad Niftəliyev tərəfindən qətlə yetirilib.

İlkin ehtimallara əsasən, şübhəli şəxs evə gələrək Sabir Əliyevdən pul istəyib. Yaşlı kişi pul verməkdən imtina etdikdən sonra tərəflər arasında mübahisə yaranıb və cinayət hadisəsi baş verib.

Məlumata görə, cinayəti törətməkdə şübhəli bilinən Murad Niftəliyev bir müddət əvvəl narkotik asılılığına görə müalicə aldığı müəssisədən yeni çıxıb. Lakin müalicədən qayıtdıqdan sonra, o, yenidən narkotikə olan aludəçiliyini davam etdirib.

Hadisədən bir gün əvvəl isə sözügedən gənc qonşusu Sabir Əliyevdən narkotik almaq üçün pul istəsə də, ahıl kişi ona rədd cavabı verib. Bir gün sonra yenidən pul istəyən Murad Niftəliyev rədd cavabı aldıqdan sonra məlum cinayəti törədib. Daha sonra o, evi qarət etməyə çalışıb, lakin qonşuların səsə çıxdıqlarını görərək hadisə yerindən qaçıb.

Polis əməkdaşlarının keçirdikləri əməliyyat tədbirləri nəticəsində 29 yaşlı Murad Niftəliyev saxlanılaraq istintaqa təhvil verilib.

Faktla bağlı rayon prokurorluğunda cinayət işi başlanılıb, araşdırma aparılır.