Daş Güzdəkdə faciə | 65 yaşlı kişinin ölümünə məsuliyyətsizlik səbəb oldu? - Baku TV

Abşeron rayonunun Daş Güzdək qəsəbəsində yerləşən daş karxanalarından birində ölüm hadisəsi baş verib.

Hadisə zamanı 65 yaşlı Cəlilabad rayon sakini Rabil Zərbəliyevin ayağı daş karxanasında istifadə olunan qurğuya düşüb. Ağır xəsarət alan işçi xəstəxanaya aparılarkən yolda həyatını itirib.

Hadisənin hansı daş karxanasında baş verdiyi hələlik dəqiq müəyyən edilməyib. Ərazidə çoxsaylı karxanaların olması səbəbindən hadisənin baş verdiyi konkret müəssisənin müəyyənləşdirilməsi çətinləşib.

Baku TV əməkdaşının ərazidən hazırladığı reportaj zamanı daş karxanalarında iş şəraiti ilə bağlı ciddi problemlər də müşahidə olunub. Ərazidə köhnə və istismar müddətini başa vurduğu ehtimal edilən qurğulardan istifadə edildiyi, bəzi elektrik naqillərinin isə açıq vəziyyətdə olduğu bildirilib.

Reportaj zamanı işçilərin istirahət etdiyi və qidalandığı şəraitin də qənaətbəxş olmadığı müşahidə edilib.

Həmçinin qeyd edilib ki, belə müəssisələrdə çalışan şəxslərin əmək müqaviləsi olmadan işlədilməsi ilə bağlı da suallar yaranır. Bu isə işçilərin təhlükəsizliyi ilə yanaşı, bədbəxt hadisə zamanı məsuliyyət məsələsini də gündəmə gətirir.