DSX-nin baş gizirini öldürməkdə təqsirləndirilən şəxslərə hökm oxunub

Dövlət Sərhəd Xidmətinin giziri Cəsarət Vəliyevi qətlə yetirməkdə, xidmətin digər əməkdaşı Camal Həsənova isə xəsarət yetirməkdə təqsirləndirilən İlqar Abdurrahmanov və Orxan Zeynalovun cinayət işi üzrə məhkəmə istintaqı yekunlaşıb.

Bakı Ağır Cinayətlər Məhkəməsində hakim Eldar İsmayılovun sədrliyi ilə keçirilən son prosesdə hökm oxunaraq İlqar Abdurrahmanov 18 il 6 ay, Orxan Zeynalov isə 19 il azadlıqdan məhrum edilib.

Qeyd edək ki, hadisə 2023-cü ilin martın 16-da metronun “20 Yanvar” stansiyası yaxınlığındakı restoranda mahnı sifarişi zamanı baş verib. Aralarında yaranan mübahisəyə görə Cəsarət Vəliyev qətlə yetirilib, Camal Həsənov isə xəsarət alıb. Hadisəni törətməkdə şübhəli bilinən Orxan Zeynalov və İlqar Abdurrahmanov saxlanılaraq barələrində həbs qətimkan tədbiri seçilib. Onlara qarşı Cinayət Məcəlləsinin bir neçə ağır maddəsi ilə ittiham irəli sürülüb.