DTX-nin saxladığı əcnəbi nələri etiraf etdi? | Bakıdakı məhkəmədə qalmaqallı ifadələr

Külli miqdarda rüşvət alma və digər cinayət əməllərində ittiham olunan Fransanın “SAUR” şirkətinin vitse-prezidenti Anass Derrazın barəsində Dövlət Təhlükəsizliyi Xidmətində başlanılmış cinayət işi üzrə məhkəmənin növbəti iclası keçirilib.

Bakı Ağır Cinayətlər Məhkəməsində hakim Fərid Namazovun sədrliyi ilə keçirilən prosesdə Derraz bildirib ki, iş adamı Fərhad Əhmədovla ortaq dostları vasitəsilə tanış olub.

Onun sözlərinə görə, Dubayda hüquqi məsləhət müqabilində aldığı qonorar Əhmədovun İsveçrədəki bank hesabından köçürülüb.

Derraz ifadəsində deyib ki, Fransa Prezidentinin mühafizə xidmətinin sabiq rəisi Aleksandr Benalla ilə birlikdə Əhmədovun “Luna” adlı yaxtasının üzərindən həbsin götürülməsi üçün lobbiçilik fəaliyyətinə cəlb olunub və bunun üçün müqavilə bağlayıblar. Müqavilənin dəyəri 6,14 milyon dollar olub, pulun bölünməsinə də razılaşıblar. O, avans olaraq 200 min dollar aldığını etiraf edib, lakin nəticədə yaxta azad edilməsə də, aldığı qonorarını geri qaytarmadığını söyləyib.

Məhkəmə prosesi oktyabrın 2-də şahid ifadələri ilə davam etdiriləcək.