Ərazidəki işıqforlar niyə yığışdırılıb? | Qala qəsəbəsində mikroavtobus qatara çırpıldı

Oktyabrın 21-i gecə saatlarında paytaxtın Qala qəsəbəsində dəhşətli yol-nəqliyyat hadisəsi baş verib.

Belə ki, Qala qəsəbəsində magistral yolda üzü şəhər istiqamətində hərəkət edən avtomobil dəmir yolunda qatara çırpılıb.

Hadisə nəticəsində sürücü və avtomobildə olan sərnişin müxtəlif dərəcəli bədən xəsarətləri alıb.

Bu, sözügedən ərazidə baş verən ilk belə nəqliyyat hadisəsi deyil.

Ərazidə işləyən aidiyyəti qurumların əməkdaşları bildiriblər ki, bir neçə ay bundan əvvələ kimi yolun hər iki hissəsində işıqfor var idi və qatar gələndə qırmızı işıq yanırdı. Lakin artıq həmin işıqforlar ərazidən götürülüb.

Nəticədə gecə saatlarında bu yolla hərəkət edən sürücülər qatarların ərazidən keçdiyindən bixəbər olurlar və bu da bəzi hallarda qəza ilə nəticələnir.

Nəqliyyat eksperti Elməddin Muradlının sözlərinə görə, dəmir yolu keçidləri mütləq nizamlanan olmalıdır:

“İşıqfor və şlaqbaumla nizamlanmalıdır. Belə olan halda da bu hadisələrin qarşısını almaq olar”.