Fəhlələri daşıyan mikroavtobus qəzaya uğrayıb

Cəlilabadda fəhlələri aparan mikroavtobus qəzaya uğrayıb. Hadisə köhnə Ələt-Astara yolunun Cəlilabaddan keçən hissəsində qeydə alınıb.

Avtomobildə olan 13 nəfər Biləsuvarın Zəhmətabad kənd sakinləridir. Fəhlələr axşam saatlarında kartof sahəsindən evə qayıdırmışlar.

Qəzaya səbəb kimi mikroavtobusun sükanında yaranmış problem göstərilir. Avtomobil yol qırağındakı ağaca çırpılıb.

Hadisə zamanı xəsarət alan 8 nəfər – 7 qadın, 1 uşaq Biləsuvar Rayon Mərkəzi Xəstəxanasının Təcili tibbi yardım bölməsinə yerləşdirilib. Onlara zəruri tibbi xidmətlər göstərilib.

Vəziyyətləri qənaətbəxş olan 6 nəfər ambulator müalicə üçün evə buraxılıb. 2 nəfərin müalicəsi isə Cərrahiyyə şöbəsində davam etdirilir, onların vəziyyətləri orta ağırdır.

Faktla bağlı araşdırma aparılır.