"Girirlər suya, orada batıb qalırlar" | Əhali etiraz edir: "Pensiyaçıyam, girinc qalmışam" - Baku TV

Cəlilabadda fermerlər suvarma problemindən əziyyət çəkirlər.

Maldarlıqla məşğul olan təsərrüfat sahiblərinin sözlərinə görə, Muğan-Salyan kollektorundan təsərrüfatlara suyun verilməsi dayandırılıb.

Fermerlər bildirirlər ki, nəticədə 700-dən çox mal-qara susuz qalıb, yonca sahələri isə məhv olmaq təhlükəsi ilə üz-üzədir. Sakinlər yaranan problemlə bağlı Baku TV-nin qaynar xəttinə müraciət ediblər.

Fermerlərdən biri suyun əvvəllər fasiləsiz verildiyini deyib və vəziyyəti belə ifadə edib:

“Gözümü açandan bu kanaldan həmişə su axıb. İçməli su kimi olmasa da, bütün mal-qara üçün ondan istifadə etmişik, əkinimizi suvarmışıq. İndi suyumuzu kəsiblər. Pensiyaçı adamam, maşınla su almağa pulum yoxdur. Mal-qaram susuz qalıb qırılır. Əgər heyvanlar tələf olarsa, insanlar da pis vəziyyətdə qalacaq. Heyvan olmayandan sonra ailəmizi nə ilə saxlayacağıq?! ”.