“Gecə bildik ki, Ləman ölüb...” | 19 yaşlı tələbənin başına gələn yaxınlarını şoka saldı - Baku TV

Gəncədə 19 yaşlı tələbə dəm qazından boğularaq həyatını itirib.

Hadisə aprelin 5-də gecə saatlarında şəhərin Vaqif küçəsi, 96 ünvanında yerləşən fərdi yaşayış evlərindən birində baş verib.

Əslən Ağcabədi rayonundan olan, Gəncədə ali təhsil alan və qrup yoldaşları ilə kirayədə qalan 19 yaşlı Ləman Əliyeva vanna otağında çimərkən dəm qazından zəhərlənib.

Mərhumun tələbə yoldaşı Mələk Səlimova hadisə ilə bağlı açıqlama verib:

“Gecə saatlarında qrup yoldaşlarımız zəng etdi ki, Ləman ölüb. O, çox yaxşı insan və sadiq dost idi. Həmişə bir yerdə vaxt keçirirdik. Belə bir hadisənin baş verəcəyi ağlımızın ucundan belə keçməzdi”.

Qeyd edək ki, L.Əliyeva hadisədən dərhal sonra huşsuz vəziyyətdə Gəncə Şəhər Birləşmiş Xəstəxanasının nəzdində fəaliyyət göstərən akademik Zülfüqar Məmmədov adına xəstəxanaya çatdırılsa da, həkimlərin səylərinə baxmayaraq, onun həyatını xilas etmək mümkün olmayıb. Meyit müayinə olunmaq üçün Məhkəmə Tibbi Ekspertiza və Patoloji Anatomiya Birliyinin Gəncə şəhər şöbəsinə təhvil verilib.

Faktla bağlı Gəncə Şəhər Prokurorluğunda araşdırma aparılır.