Gəncədə faciəvi hadisənin təfərrüatı üzə çıxdı | 4 nəfər isə...

Gəncənin Gülüstan qəsəbəsində yol qəzası baş verib.

“VAZ-2107” və “Ford Fusion” markalı minik maşınlarının yolayrıcında toqquşması nəticəsində 5 nəfər xəsarət alıb.

Onlar “Ford”un sürücüsü, 36 yaşlı Rəşad Qasımov və Şəmkir rayon sakinləri – “VAZ”ın sürücüsü, 40 yaşlı Vasif Məmmədov, 58 yaşlı Rəna Əhmədova, 56 yaşlı Məlahət Eyyubova və 34 yaşlı Zəkiyə Heydərovadır. Yaralılar əraziyə gələn təcili tibbi yardım briqadasının köməyi ilə Gəncə Şəhər Birləşmiş Xəstəxanasının nəzdində Akademik Zülfüqar Məmmədov adına xəstəxanaya çatdırılıb.

4 nəfərin vəziyyəti qənaətbəxş hesab olunduğundan ambulator müalicəyə buraxılıb. Qapalı kəllə-beyin travması alan 56 yaşlı Məlahət Eyyubovanın müalicəsi isə davam etdirilir, vəziyyəti orta-ağır qiymətləndirilir.

Qeyd edək ki, qəzada xəsarət alan Şəmkir sakinləri rayonun Sabirkənd kənd orta məktəbinin müəllimləridir. Onlar Gəncədə sertifikasiya imtahanı verdikdən sonra geri dönürmüşlər.

Faktla bağlı araşdırma aparılır.