Hamilə qadının bədənində zərbə izləri tapıldı

Saatlıda hamilə qadın döyülüb. Bununla bağlı məlumatlar sosial şəbəkələrdə yayılıb.

Qadının yaxınlarının dediyinə görə, o, əri Təbriz Orucov, qayınanası və qaynı tərəfindən vəhşicəsinə döyülüb.

Hadisənin qeydə alındığı Orta Muğan kəndində olduq. Ailə üzvləri çəkiliş aparmağımıza icazə verməsə də, şifahi olaraq bildiriblər ki, Təbriz Orucov müharibə iştirakçısıdır və müalicə alır. Onun həyat yoldaşı ilə əvvəllər də aralarında xırda mübahisələr olub, lakin bu gün sosial şəbəklərdə yayılan məlumatlar həqiqəti əks etdirmir.

Döyüldüyü iddia edilən qadının qardaşı Ruzbeh Məmməd isə açıqlamasında qeyd edib ki, bacısı valideynləri ilə əlaqə saxlamaq istəyəndə belə ona qarşı şiddət göstərilib.

Hamilə qadının vəziyyəti ilə bağlı TƏBİB də açıqlama yayıb. Qurumun tabeliyindəki Abşeron Rayon Mərkəzi Xəstəxanasından bildirilib ki, 1990-cı il təvəllüdlü sözügedən qadın təcili tibbi yardım briqadası tərəfindən xəstəxananın Təcili Tibbi Yardım bölməsinə təxliyə olunub, ona ilkin olaraq kürəyin və sol sağrı nahiyəsinin yumşaq toxumalarının əzilməsi, dərialtı hematoması diaqnozu qoyulub.

Aparılan əlavə tibbi müayinələr zamanı vətəndaşın dörd həftə beş günlük hamilə olduğu aşkar olunub. Həkimlər tərəfindən ona zəruri tibbi xidmət göstərilib və vəziyyəti qiymətləndirildikdən sonra ambulator müalicə üçün evə buraxılıb.

Faktla bağlı Saatlı RPŞ-də müvafiq araşdırmalar aparılır və aparılan araşdırmaların nəticəsindən asılı olaraq məsələyə hüquqi qiymət veriləcəyi bildirilir.