Həkim xəstəxanada vətəndaşa hücum edib?

Biləsuvar sakini Əlicavad Gənciyev avqustun 8-də Rayon Mərkəzi Xəstəxanasının Təcili və təxirəsalınmaz tibbi yardım şöbəsinin müdiri Ülvi Abbasov tərəfindən döyülüb.

Bununla bağlı yayılan videoda Ülvi Abbasovun ona hücum edərək yumruq atması əks olunub.

İddia edilir ki, ixtisasca nevroloq həkimin atdığı yumruq pasiyentə, vurduğu təpik isə yanında olan 5 yaşlı uşağa dəyib.

Hadisə Əlicavad Gənciyevin təzyiqi qalxan atasını Biləsuvar Rayon Mərkəzi Xəstəxanasına gətirdikdən sonra baş verib. Təzyiqli xəstə iynə vurulduqdan sonra istirahət edərkən hər hansı tanıdıcı nişanı olmayan həkim onların xəstəxana oturacağında əyləşmələrinə irad tutub.

“Həkimə yaxınlaşıb etdiklərinin düzgün olmadığını bildirəndə mühafizəçiləri çağırdı, mənə təhqiramiz sözlər dedi. Atam polisə zəng edərkən həkimin görüntülərini çəkdim. Həmin vaxt mənə zərbə endirdi, yanımdakı 5 yaşlı qohumum da xəsarət aldı”, – şikayətçi Ə.Gənciyev deyib.

Hadisə ilə bağlı Gənciyevlər ailəsi hüquq-mühafizə orqanlarına müraciət edib. Hazırda faktla bağlı araşdırma aparılır.