Həyat yoldaşının qətlində təqsirləndirilənə ağır cəza - Baku TV

Suraxanı rayonunun Qaraçuxur qəsəbəsindəki parkda həyat yoldaşını qətlə yetirməkdə təqsirləndirilən Natiq Məhərrəmovun cinayət işinin məhkəmə istintaqı yekunlaşıb.

Bakı Ağır Cinayətlər Məhkəməsində keçirilən prosesdə müdafiə tərəfinin vəsatəti ilə DNT analizinin nəticələri elan olunub. Prosesdə genetik ekspertizanın rəyi açıqlanaraq Natiq Məhərrəmovun iddiaları rədd edilib və onun hər iki uşağın atası olduğu təsdiqlənib.

Prokurorun təqsirləndirilənin 19 il 6 ay azadlıqdan məhrum edilməsini məhkəməyə təklif etməsinə baxmayaraq, Natiq Məhərrəmov 17 il 6 ay müddətinə azadlıqdan məhrum edilib.

Qeyd edək ki, sözügedən hadisə 2025-ci ilin aprelin 7-si saat 19:00 radələrində Qaraçuxur qəsəbəsində yerləşən Neftçilər parkında baş verib. Təqsirləndirilən məhkəmə istintaqı dövründə sərbəst ifadələri zamanı törətdiyi hadisəni gözəgörünməz qüvvələrin təkidi ilə həyata keçirdiyini iddia edib.

Suraxanı Rayon Prokurorluğu tərəfindən Natiq Məhərrəmova Cinayət Məcəlləsinin 120.2.2-ci (xuliqanlıq niyyəti ilə qəsdən adam öldürmə), 120.2.4-cü (xüsusi amansızlıqla qəsdən adam öldürmə) və 221.3-cü (xuliqanlıq, silah və ya silah qismində istifadə olunan əşyalarla törədildikdə) maddələri ilə yekun ittiham verilib.