İsmayıllıda doğuş üçün xəstəxanaya gətirilən ana həyatını itirib

İsmayıllıda ana doğuşdan sonra ölüb. Hadisə dekabrın 24-də baş verib.

Qarabağ qəsəbəsində yaşayan Şuşa sakini, 31 yaşlı Ülviyyə Əhmədova doğuş sancıları ilə xəstəxanaya müraciət edib. Dekabrın 23-ü qeysəriyyə yolu ilə doğuş həyata keçirilib. 1 gün sonra, dekabrın 24-də günorta saatlarında ananın səhhətində problem yaranıb. Yaranan ciddi fəsadlar onun həyatına son qoyub. Ailə bu hadisədə həkimləri günahkar hesab edir.

“Axşam hər şey yaxşı idi. Səhər həkim iynə vurub. Ondan sonra dedi ki, ağrılarım çoxdu”, – deyə mərhumun bacısı bildirib.

İsmayıllı Rayon Mərkəzi Xəstəxanasından Baku TV-yə verilən məlumata görə, Əhmədova Ülviyyə Hacı qızı dekabr 23-də saat 10:20-də qeysəriyyə əməliyyatı olub. Xəstənin əməliyyatdan sonra vəziyyəti qənaətbəxş hesab edilib. Lakin dekabrın 24-də səhər saatlarında ölüm faktı qeydə alınıb.

Ölüm halı ilə bağlı TƏBİB-in müvafiq komissiyası tərəfindən araşdırma aparılır. Meyid məhkəmə-Tibbi Ekspertiza və Pataloji Anatomiya Birliyinə təhvil verilib.

Qeyd edək ki, mərhum bundan öncə təbii yolla 2 doğuş keçirib. Yeni doğulan körpənin durumu normaldır.