İtlərin hücumuna məruz qalan turist necə xilas edildi? - Baku TV

Avqustun 29-da Şəki rayonunun dağlıq ərazisində Niderland vətəndaşı itlərin hücumuna məruz qalaraq ağır xəsarətlər alıb.

Hadisə Baş Zəyzid kəndinin “Kələngəz yaylağı” kimi tanınan ərazisində, dəniz səviyyəsindən təxminən 2 000 metr yüksəklikdə baş verib.

İlkin məlumata görə, turist avqustun 26-da Frankfurt-Bakı aviareysi ilə Azərbaycana gəlib. Avqustun 29-da səhər saatlarında turizm məqsədilə piyada yürüşə çıxan Niderland vətəndaşı “Kələngəz yaylağı” istiqamətində hərəkət edərkən bir neçə itin hücumuna məruz qalıb.

Saat 17 radələrində onun köməyə ehtiyacı olduğu barədə Dövlət Sərhəd Xidmətinin Şəki Sərhəd Dəstəsinə məlumat daxil olub.

Çətin dağlıq relyef və qaranlıq hava şəraitinə baxmayaraq, DSX-nin xüsusi Hava Əməliyyatları Qüvvələrinin helikopteri ilə əraziyə tibb heyəti və xilasetmə qrupu göndərilib. Başından və bədənindən çoxsaylı açıq yara alan turistə hadisə yerində ilkin tibbi yardım göstərilib və helikopterlə Şəki Rayon Mərkəzi Xəstəxanasına çatdırılıb.

Sakinlərin sözlərinə görə, ərazidə itlərin sahibsiz, yaxud çoban itləri olması hələlik məlum deyil.