“Qazanda elə şeylər gördük ki...” | Yerin altında qorunan bu muzey niyə dünyada unikaldır? - Baku TV

“Əbədi sükut dünyası - Labirint” muzeyində arxeoloji qazıntılar zamanı tapılan bütün mədəniyyət abidələri və qəbir formaları aşkar edildikləri yerdə olduğu kimi qorunur.

Qeyd edək ki, Şəkinin Fazıl kəndi ərazisində ötən əsrin 80-ci illərindən etibarən tədqiqat işlərinə başlanılıb. Bu məkan mərhum arxeoloq Nəsib Muxtarovun uzun illər ərzində apardığı tədqiqat nəticəsində aşkar edilib və muzey halına gətirilib.

AMEA-nın böyük elmi işçisi İntizar Bədəlova bildirib ki, adıçəkilən muzey dünyanın ən orijinal arxeoloji elmi-praktik muzeyidir:

“Kiçik bir kənddə beş yerdə yaşayış yeri aşkarladıq. Bunlardan birini muzey halına gətirdik. Dörd yaşayış yerində Dəmir dövrünə aid abidə tapdıq. Amma “Təpəbaşı” adlanan və beş hektar sahəsi olan bu ərazidə eramızdan əvvəl birinci minilliyin birinci yarısından orta əsrlərə qədər dəfnlərin izləri ilə rastlaşdıq. Qazıntılar zamanı gördük ki, heç bir dəfn bir-birinin təkrarı deyil. Bu səbəbdən buranı muzey halına gətirdik. Burada ən qədim eksponat eramızdan əvvəl birinci minilliyin birinci yarısına aiddir. Bu muzeyi 2006-cı ildə yaratsaq da, dövlət statusu almayıb”.