Külək 35 yaşlı kişini xəstəxanalıq etdi | Baku TV hadisə yerində - Baku TV

Bakının Xətai rayonunda güclü külək bədbəxt hadisəyə səbəb olub.

Hadisə “Amay” Ticarət Mərkəzinin yaxınlığında qeydə alınıb. İlkin məlumata görə, binanın fasadından qopan aqlay daşı ərazidən keçən 1991-ci il təvəllüdlü kişinin başına düşüb.

Hadisə yerinə təcili tibbi yardım briqadası cəlb olunub. Yaralı Kliniki Tibbi Mərkəzə hospitalizasiya edilib.

Ona skalpın kəsilmiş yarası diaqnozu qoyulub və zəruri tibbi yardım göstərilib. Hazırda müalicəsi Neyrocərrahiyyə şöbəsində davam etdirilən şəxsin vəziyyəti stabil qiymətləndirilir.

Hadisə şahidlərinin sözlərinə görə, yaralanan şəxs ərazidə yerləşən binalardan birində işləyirmiş. O, fasilə zamanı çölə çıxdığı anda fasaddan qopan daş parçası başına düşüb.

Ərazidə çalışan şəxslər bildiriblər ki, ticarət mərkəzinin fasad daşlarının qopması ilk dəfə deyil.

Hadisə yerindən çəkilən görüntülərdə binanın fasadının bir hissəsində daşların tamamilə töküldüyü, bəzi hissələrdə isə üzlük daşlarının divardan aralandığı görünür.