Lənkəranda turist avtobusunun düşdüyü ağır qəzada direktor öldü

Lənkəranda ölümlə nəticələnən yol-nəqliyyat hadisəsi baş verib.

Hadisə rayonun Hirkan-Daştatürk-Biləsər avtomobil yolunda, Xanbulan kəndi ərazisində qeydə alınıb.

Ramiz Məmmədovun idarə etdiyi “Nissan” markalı minik avtomobili turistləri daşıyan iritutumlu avtobusla toqquşub. Nəticədə “Nissan”ın sürücüsü və maşında sərnişin qismində olan 66 yaşlı Tahir Zülfüqarov və 72 yaşlı Şakir Həbibov müxtəlif dərəcəli bədən xəsarətləri alaraq Mərkəzi Rayon Xəstəxanasına çatdırılıblar.

Qəzada ağır yaralanan məktəb direktoru Ramiz Məmmədov Masallı rayonundakı özəl xəstəxanaların birinə göndərilib. Buna baxmayaraq, onun həyatını xilas etmək mümkün olmayıb.

Qeyd edək ki, R.Məmmədov Lənkəran rayonunun Liman şəhərində 2 saylı məktəbin direktoru idi. Ş.Həbibov Lənkəran Dövlət Universitetinin riyaziyyat kafedrasının müəllimi, T. Zülfüqarov isə Lənkəran Dövlət Universitetində inzibati işdə çalışır. Müəllimlər vaxtilə dərs dedikləri Lənkəran şəhər 3 saylı məktəbin məzunlarının 30 illiyinə gedərkən qəzaya düşüblər. Turist avtobusunda olanlardan xəsarət alan olmayıb. Faktla bağlı araşdırma aparılır.