Məhkəmə Fransada yaşayan Məhəmməd Mirzəli barədə nə qərar verdi?

Binəqədi Rayon Məhkəməsində Fransada yaşayan azərbaycanlı Məhəmməd Mirzəlinin barəsində olan cinayət işi üzrə məhkəmə prosesi başa çatıb.

“Oxu.Az”ın məlumatına görə, hakim Vüsal Tağıyevin sədrliyi ilə keçirilən prosesdə təqsirləndirilən şəxsə hökm oxunub.

Məhkəmənin hökmü ilə Məhəmməd Mirzəli 6 il 6 ay müddətinə azadlıqdan məhrum edilib. İttihama görə, Məhəmməd Mirzəli barəsində Cinayət Məcəlləsinin bir neçə maddələri ilə ittiham elan olunub.

Qeyd edək ki, Məhəmməd Mirzəli ümumvətəndaş pasportundan istifadə etməklə 2016-cı il fevralın 17-də saat 05:06-da “Şıxlı” sərhəd nəzarəti məntəqəsindən keçərək Azərbaycanı tərk edib. Daha sonra müvəqqəti məskunlaşdığı Fransa Respublikası və digər xarici dövlətlərin ərazisində “YouTube” internet kanalındakı profilində 2018-ci il fevralın 6-sı və 12-də, martın 17-si, 20-si və 21-də, mayın 24-ü və 25-də Azərbaycan dilində yerləşdirdiyi videolarda dövlət əleyhinə çağırışlar səsləndirib.

Daha sonra o, hakimiyyət nümayəndəsinin qanuni tələblərinə fəal şəkildə tabe olmamağa və kütləvi iğtişaşlara, habelə vətəndaşlara qarşı zorakılıq etməyə, Azərbaycanda hakimiyyətin zorla ələ keçirilməsinə, zorla saxlanılmasına və Azərbaycan Respublikasının Konstitusiya quruluşunun zorla dəyişdirilməsinə yönələn açıq çağırışlar edib.

Bu ilin martında Azərbaycanın Baş Prokurorluğunda Məhəmməd Fazil oğlu Mirzəlinin barəsində qiyabi icraat üzrə istintaq başlayıb. Ona Cinayət-Prosessual Məcəlləsinin 467-13.4-cü maddəsinin tələbinə əsasən rəsmi bildirişlər göndərilib. O, istintaqın qanuni çağırışlarına gəlməyib və buna görə qiyabi icraat üzrə araşdırma davam etdirilib.