“Mən onlara borclu deyiləm!” - Ölən ərinin mağazasını qadının əlindən alıblar?

Vətəndaş Xatirə Şükürova iddia edir ki, həyat yoldaşı vəfat edəndən sonra “Sədərək” ticarət mərkəzində yerləşən mağazaları onların əllərindən alınıb.

Onun sözlərinə görə, mağazanın onlara aid olması ilə bağlı bütün sənədlər mövcud olsa da, obyekti işlətməyə icazə verilmir.

Xatirə Şükürova bildirir ki, həyat yoldaşı həmin mağazada 16 il fəaliyyət göstərib və onlar həmin yeri pul ödəməklə alıblar. Lakin obyektin rəsmiləşdirilməsi zamanı sənədlərdə mərhumun adının qeyd olunmadığı üzə çıxıb.

“Mart ayından etibarən bizi burada işləməyə buraxmırlar. Bildirirlər ki, guya borcumuz var və 50 min manat ödənilməlidir”, – deyə vətəndaş qeyd edib.

Məsələ ilə bağlı “Sədərək” ticarət mərkəzinin mətbuat xidməti də açıqlama verib.

Qurumdan bildirilib ki, həmin şəxsin adına obyektlə bağlı heç bir rəsmi sənədləşdirmə aparılmayıb.