Neftçalada ağır qəza: Teplovozla yük maşını toqquşdu

Neftçalada teplovozla yük maşını toqquşub, ölən və xəsarət alan var.

Hadisə rayonun Qazaxbərəsi kəndi ərazisindən keçən hissəsində qeydə alınıb.

Belə ki, tənzimlənməyən dəmir yolunda teplovoz yük maşını ilə toqquşub. Qəza nəticəsində İmişli rayon sakini 1995-ci il təvəllüdlü Vüsal Rüstəm oğlu Fəxrətov hadisə yerində həyatını itirib. Salyan rayon sakini 1969-cu il təvəllüdlü İbad İnqilab oğlu İbadov isə xəsarət alıb. İ.İbadov Neftçala Rayon Mərkəzi Xəstəxanasına çatdırılıb.

Hadisə ilə bağlı “Azərbaycan Dəmir Yolları” mətbuat xidməti açıqlama yayıb.

“Bu gün saat 12:50 radələrində ADY QSC-yə məxsus teplovoz Neftçala rayonu ərazisində Qırmızıkənd-Daykənd mənzilində hərəkətdə olarkən 99-ZU-832 dövlət nömrə nişanlı “Shacman” markalı yük maşını qorunmayan dəmir yolu keçidində qəfil qatarın qarşısına çıxıb.

Maşinist təcili tormozlama aparsa da, toqquşma qaçılmaz olub və yük maşınının sürücüsü, İmişli rayonu Qaradonlu kənd sakini Vüsal Rüstəm oğlu Fəxrətov həlak olub. Hadisənin baş vermə səbəbləri aidiyyəti üzrə araşdırılır”, – qurumdan bildirilib.