Partlayışa görə yol bağlandı | "Oba" marketdəki dəhşətli hadisə barədə detallar

Bakının Xəzər rayonu, Binə qəsəbəsi ərazisində yerləşən “Oba” marketdə partlayış baş verib.

Məlumatla əlaqədar dərhal Fövqəladə Hallar Nazirliyinin Dövlət Yanğından Mühafizə Xidmətinin qüvvələri əraziyə cəlb olunub.

Yanğın genişlənməsinə, o cümlədən ikinci mərtəbədə yerləşən evə keçməsinə imkan verilmədən qısa müddətdə söndürülüb.

Yanğın nəticəsində ümumi sahəsi 180 kv.m. olan mağazanın yanar konstruksiyaları 130 kv.m. sahədə yanıb. Mağazanın qalan hissəsi və 2-ci mərtəbədə yerləşən mənzil yanğından mühafizə olunub.

Hadisə nəticəsində üç nəfərin (qadın cinsli) yaralandığı bildirilir. Yaralılar müxtəlif dərəcəli yanıq xəsarətləri ilə Nərimanov Tibb Mərkəzinin nəzdində fəaliyyət göstərən Yanıq Mərkəzinə təxliyə olunublar.

Xəstəxanadan bildirilib ki, xəsarət alan şəxslərə əl və üz nahiyəsinin II-III dərəcəli yanıq diaqnozu təyin edilib: “Onlara zəruri tibbi yardım göstərilib. Vəziyyətləri qənaətbəxş hesab olunduğuna görə ambulator müalicə üçün evə buraxılıblar”. Hadisə ilə əlaqədar aidiyyəti qurumlar tərəfindən araşdırma aparılır.