Polis əməkdaşları ilə sürücü arasında mübahisə

Bakı şəhərində sürücü və Daxili İşlər Nazirliyinin Dövlət Yol Polisi İdarəsinin əməkdaşları arasında gərginlik yaşanıb.

Hadisə Xətai rayonu, Xaqani Rüstəmov küçəsində qeydə alınıb. Belə ki, iki polis əməkdaşı ilə “VAZ-2107” markalı avtomobilin sürücüsü Amin Qabilov arasında mübahisə baş verib. Mübahisə bir müddət sonra əlbəyaxa dava səviyyəsinə yüksəlib. Nəticədə polis əməkdaşları sürücünü zorla maşına mindirərək polis bölməsinə aparıblar.

Məsələ ilə bağlı Bakı Şəhər Dövlət Yol Polisi İdarəsindən verilən məlumata görə, “VAZ” markalı avtomobilin konstruksiyasında dəyişiklik və digər xətalara görə nəqliyyat vasitəsinin sürücüsü Amin Qabilova yol polisləri tərəfindən “saxla” işarəsi verilib. Sürücüyə etdiyi qayda pozuntusu izah edilən zaman o, yol polislərinə qarşı itaətsizlik göstərib. Daha sonra həmin sürücü ərazi üzrə Polis İdarəsinə dəvət edilib.

Onun barəsində İnzibati Xətalar Məcəlləsinin 535-ci, yəni polis işçisinin və ya hərbi qulluqçunun qanuni tələbinə qəsdən tabe olmama maddəsi ilə protokol tərtib edilib və baxılması üçün məhkəməyə göndərilib.