Polisə hədə-qorxu gəldi ki... | Salyanda baş verən hadisənin təfərrüatları

06 sentyabr 2024 310 baxış

“Baş Dövlət Yol Polisi İdarəsinin (BDYPİ) Salyan rayonu ərazisində yerləşən stasionar postunda “KİA” markalı avtomobil yoxlama-nəzarət qaydasında saxlanılıb”.

Bu barədə BDYPİ məlumat yayıb.

Məlumata görə, sürücüdən sənədlər istənildikdə o, avtomobildən düşərək qaçmağa çalışıb, lakin Yol Patrul Xidmətinin əməkdaşlarının sayıqlığı nəticəsində yaxalanıb.

Araşdırma zamanı həmin şəxsin Sumqayıt şəhər sakini Orxan Allahverdiyev olması və narkotik vasitənin təsiri altında sükan arxasına əyləşməsi müəyyən edilib.

“Faktın araşdırılması zamanı polisin qanuni fəaliyyətinə müdaxilə etməyə cəhd edən O.Allahverdiyevin valideyni övladının hüquqazidd əməllərinə haqq qazandırmağa çalışıb, Dövlət Yol Polisi əməkdaşlarına hədə-qorxu gələrək müqavimət göstərib”, – deyə məlumatda qeyd olunub.

Bildirilib ki, hər iki şəxs saxlanılaraq ərazi aidiyyəti üzrə polis orqanına təhvil verilib və toplanan materiallar baxılması üçün məhkəməyə göndərilib.

#Baş Dövlət Yol Polisi İdarəsi